Tuesday, July 17, 2012

Tuan Putri Disunting Tuan Raje Mude

Setaon nyang lalu, ade tuan putri nyang merengut aje pagi-pagi lantaran rombongan tuan raje mude kagak kunjung nongol di rumah tuan putri.
hal-fairy.blogspot.com

Untungnye tuan putri ditemenin kengkawannye nyang ude pade cakep di dandanin tukang rias.
hal-fairy.blogspot.com

Kagak berape lama alhamdulillah rombongan tuan calon mantu alias tuan raje mude nyampe juga. Langsung dah disambut petasan banting nyang berisiknye bikin orang sekampung pade ngumpul. Kagak lupe diiringin ketimpring sambil iring-iringan ke tempat tuan putri.
hal-fairy.blogspot.com

hal-fairy.blogspot.com


Nyampe rumah tuan putri, biar kate ude ditungguin sama calon besan, kagak langsung dibolehin masuk. Ditanyain dulu keperluannye kesitu mau ngapain, orang betawi nanyanye pegimane lagi ye kalo bukan saling bebales pantun. Ditantangin juga, beneran kagak nih tuan raje mude mau ngawinin tuan putri. Ade syaratnye, Jagoan tuan raje mude kudu bisa ngalahin jagoan tuan putri, kalo kalah, jangan harap bisa ngelangkah masup.



Abis jagoan tuan putri kalah bisa langsung masup? Ye kagak, tuan raje mude ditantangin lagi, bisa ngaji kagak? Bukan ape-ape, pegimane mau tenang nyerahin anak perawan kalo nyang diserahin aje kagak ngarti ilmu agama? 


Syarat-syarat ude pada lewat, ude luamayan kalem nih rombongan tuan calon mantu. Keluarge tuan putri langsung nyambut tuan raje mude, tandanye ude diterima bakal jadi mantu. Terus digandeng deh ama enyak dan engkong tuan putri ke tempat ijab qabul. 


Mukanye pade tegang bener ye? Wajar aje, pan akad nikahnye belom, padahal ntu nyang paling penting. Alhamdulillah ijab qabulnye lancar, cukup sekali dan lantang. Tuan putri nyang masi di umpetin dikamar jadi terharu :')


Kelar akad, boleh dong ye tuan raje mude ketemu ama tuan putri nyang di umpetin dikamar buat nyerahin sirih dare. Tuan putri deg-deg serr gitu waktu ketemu tuan raje mude. Maklum, statusnye sekarang ude jadi bini orang :D


Abis akad pan biasanye ada resepsi tuh ye. Pengantennye ganti kostum dulu, mau make pakean penganten care betawi. Tuan putri sampe meringis-meringis waktu ditancepin kembang goyang dikepalanye, berasa lagi maen-maenan. kagak sia-sia deh kepala dipasangin pandan terus ditancep-tancep, hasilnye sesuai ame kepengenan tuan putri. Liat deh, ntu burung hong goyang-gorang nyangkut disamping :)

Namanye penganten, ade kue pengantennye dong. Alhamdulillah tuan raje mude bisa menuhin syarat nyang diminta tuan putri. Selaen bawa mas kawin, peningset, rupa-rupa anteran, ruti buaye, kekudang, sirih nanas, sirih dare, manisan, ampe miniatur mesjid, tuan raje mude juga ngebawain kue penganten bakal tuan putri. Cakep bener dah kuenye, tuan putri sampe kagak tega mau motongnya. Kalo pada pengen kue penganten cakep juga sedep rasanye kayak nyang dibawaain tuan raje mude, bisa nyari dimari

Kagak afdol ye kalo penganten betawi kagak ganti pakean lagi. Tuan putri dari jaman kecil ude kepengen bener kalo ntar die kawin bisa make pakean penganten care Belande kayak enyaknye dulu. Mangkanye tuan putri girang bener kepengenannye waktu kecil kesampean, berasa cinderella :D :D


Kelar acara, tuan putri ama tuan raje mude bukannye istirahat malah nyangkut di meja tamu terus pade iseng deh poto-poto bareng kengkawan. Abisan poto di pelaminan gayanye gitu-gitu doang. Kagak cuman di meja tamu, kamar penganten juga dipurak bakal poto. Mwahahahaha... :D




Sekian cerite tuan putri dan tuan raje mude setaon nyang lalu. Semoga pernikahan aye, si tuan putri sama abang ganteng nyang sekarang ude setaon jadi laki aye langgeng ampe dipisahin ajal dan dikasi keturunan nyang sholeh-sholehah. Aamin YRA... :)

0 comments:

Post a Comment